हडपसर विधानसभा मध्यवर्ती निवडणूक कचेरीचे उदघाटन
पाणीटंचाई, वाहतूक कोंडी आणि गुन्हेगारीमुक्त हडपसर शहर बनवायचे आहे. मतदारसंघातील समस्या सोडवण्यात विद्यमान आमदार सपशेल अपयशी ठरले आहेत.गेल्या पाच वर्षांचा बॅकलॉग भरून काढत महाविकास आघाडी हडपसरला विकासाच्या दिशेने घेऊन जाणार आहे,” असा निर्धार हडपसर विधानसभा मतदारसंघातील महाविकास आघाडीचे अधिकृत उमेदवार प्रशांत जगताप यांनी केला.बुधवारी सकाळी ग्रामदैवत ‘श्री भैरवनाथ जोगेश्वरी’चे दर्शन घेऊन प्रशांत जगताप यांनी प्रचाराचा नारळ फोडला. त्यानंतर हडपसर विधानसभा मतदारसंघातील भोसले गार्डन येथे जगताप यांच्या मध्यवर्ती निवडणूक कचेरीचे उद्घाटन झाले.
या प्रसंगी राष्ट्रवादी काँग्रेस पक्षाचे (शरदचंद्र पवार) जिल्हाध्यक्ष जगन्नाथ बापू शेवाळे, माजी महापौर अंकुश काकडे,काँग्रेस पक्षाचे ज्येष्ठ नेते माजी मंत्री बाळासाहेब शिवरकर, माजी आमदार अॅड जयदेव गायकवाड, शिवसेना उद्धव बाळासाहेब ठाकरे गटाचे माजी नगरसेवक विजय देशमुख, माजी उपमहापौर बंडू गायकवाड, माजी नगरसेवक योगेश ससाणे, ऍड. निलेश निकम, शिवसेना उपशहर प्रमुख समीर तुपे, राष्ट्रवादी काँग्रेसचे हडपसर विधानसभा अध्यक्ष प्रविण तुपे, काँग्रेसचे हडपसर विधानसभा अध्यक्ष दिलीप तुपे, शिवसेनेचे राजेंद्र बाबर यांच्यासह महाविकास आघाडीतील घटक पक्षांचे आजी-माजी पदाधिकारी, कार्यकर्ते मोठ्या संख्येने उपस्थित होते.
यावेळी प्रशांत जगताप म्हणाले, “ग्रामदैवत भैरवनाथाला नारळ वाढवत प्रचाराचा शुभारंभ करत आशीर्वाद घेतला. कुटुंबातील सदस्य, तसेच महाविकास आघाडीतील सर्व नेतेमंडळी सोबत होते. माझ्यासारख्या सामान्य कार्यकर्त्याला शरद पवार साहेबांनी हडपसरच्या विकासासाठी निवडणूक लढविण्याची संधी दिली. आपल्या सर्वांच्या साथीने या संधीचे सोने करायचे आहे. या मतदारसंघातील प्रश्न विधिमंडळात मांडून न्याय द्यायचा आहे. येथे पाणीटंचाई, वाहतूक कोंडी, वाढती गुन्हेगारी आदी समस्या आहेत. निष्क्रिय विद्यमान आमदारांनी गेल्या पाच वर्षात काहीही काम केले नाही. त्यामुळे मला जनाधार मिळत असून, आपल्या सर्वांच्या आशीर्वादाने विधिमंडळात हडपसरचे नेतृत्व करेल, असा विश्वास आहे.”
पवार साहेबांनी नेहमीच कार्यकर्त्यांना बळ दिले आहे. प्रशांत जगताप त्यापैकीच एक आहेत. महापौर, शहराचा अध्यक्ष म्हणून त्यांनी प्रभावी काम केले आहे. जनसामान्यांमध्ये मोठा संपर्क, येथील समस्यांची त्यांना जाण आहे. हडपसरच्या प्रगतीसाठी असा सुसंस्कृत व विकासाचा चेहरा जगताप यांच्या रूपाने मिळाला असल्याचे अंकुश काकडे यांनी नमूद केले.
